Basa Sunda di Radio

Kamari ieu, aya sobat nu nyarita, pangna barudak ngora teu pati resep nyarita ku Basa Sunda téh, lantaran Basa Sunda (BS) dianggap basa kolot, teu gaul. Sok wé déngékeun, cenah, dina radio. Acara nu maké BS téh, boh iklan, boh siaran, rata-rata penyiarna geus kolot, atawa sok niron sora aki-aki.
“Jadi rumaja di urang mah teu anéh mun teu pati resep nyarita ku Basa Sunda téh da dianggapna Basa Sunda mah bahasa aki-aki,” pokna.

Mémang kitu kanyataanana. Aranglangka aya siaran radio nu maké basa panganteur BS, nu penyiarna masih kénéh rumaja, atawa minimal teu kadéngé ngolot, boh sorana boh gaya nyaritana. Réréana acara nu penyiarna rumaja téh, nya nu gaya nyaritana elu gué téa, nu geus dianggap jadi bagian tina kamus basa gaul maranéhna. Tur padahal, radio téh masih gedé pangaruhna dina lebah nyiptakeun trén di lingkungan para rumaja, lian ti media citak jeung utamana televisi.

Jigana taya salahna mun nu baroga stasion radio, milu narékahan sangkan BS diparaké ku para rumaja, ku cara midangkeun acara-acara nu maké panganteur BS nu dipidangkeun ku penyiar rumaja. Teu kudu riweuh ku undak-usuk nu matak murel, keun wé sina maké basa loma. Pan basa loma téh basa gaulna urang Sunda, sanés? Saeutikna nya pikeun nyaimbangan acara radio nu siaranana sok macarukkeun basa Indonésia jeung basa Inggris. Ti dituna mah meureun ngarah kadéngé gaul téa. Tapi, kuring kungsi boga tatangga, urang bulé nu heubeul dumuk di Tasik, sakali waktu ngadéngé dina radio aya penyiar bacéco maké basa Inggris. Manéhna mah ngadon seuri, “Logat jeung lafal Basa Inggrisna anéh,” pokna.

Kiwari keur aya trén anyar di kalangan artis nu –utamana– asalna ti Sunda. Nyaéta mun nyarita téh sok dipacarukkeun jeung Basa Sunda. Maranéhna mah meureun teu niat pikeun “ngamumulé” BS, sakumaha nu sok dicorowokkeun para ahli jeung pejabat, tapi temahna hadé pisan. Réa kekecapan BS nu kiwari jadi bagian tina basa gaul para rumaja. Dina blog kuring, sok remen manggih koméntar ti nu lain urang Sunda, upamana maké kecap “aya-aya waé”. Mun teu salah kecap aya-aya waé téh dipopulérkeun ku Jarwo Kwat dina Républik mimpi. Kitu deui obrolan Aming saparakanca dina Éxtravaganza, remen kadéngé nyunda. Najan maranéhna mah ukur boga niat hayang béda dina lebah nyarita, tapi pikeun ngipuk deui kareueus kana BS mah, hal ieu gedé mangpaatna.
Jigana, mémang kudu aya tarékah nu daria ti nu baroga média, utamana nu aya jeung sumebar di tatar Sunda, pikeun milu ngahurip-hirupkeun Basa Sunda. Da ngarepkeun ti dunya atikan mah teuing iraha buktina. Beuki dieu téh BS beuki diapilainkeun. Di tingkat SMA waé pan geus euweuh pangajaranana.***

Iklan

About nazarudin azhar

urang sunda pituin

Posted on 22 Oktober 2009, in Ngabako. Bookmark the permalink. 4 Komentar.

  1. ass. muhun tea mah abdi tos saminggu ngayakinkeun, saha ari nazarudin azhar teh. ditelek-telek, ditengetkeun raray sallira dina photo. kuteu aces. dicobian dipilari dina profil sugan aya photoan. ari pek profilna age teu aya. sing horeng ningan ayana teh dina pancakaki. teu aya maksad nanaon, milarian kitu soteh, dumeh we. baheula kantos aya rerencangan anu jenenganna teh nunu nazarudin azhar. kantos siaran bareng maca puisi unggal malem minggu di RSPD Tasikmalaya, penyiarna teh ningan kang Aceng. anu sok macana simkuirng sareng nunu nazarudin azhar. eta teh salira kitu? saupami tea mah leres, haturan simkuring anu tos lawas teu pendak sareng salira. ktuna ge pami leres, saupami leupat hapunten, ieu serat etang-etang we kenalan, sok sanaos teu dipiharep kusalira. upai tea mah enya salira teh kang nunu, anu ayeuna janten nganggo nazarudin azhar, wilujeung tepang abdi akcida bingahna, tos tepang deui. obrolan teh seueur sareng salira namung bilih lepat jalmi. hapunten, mung raraosan mah, cigana enya eta teh, rerencangan baheula. mugia diwaler.

  2. Haturan kang… Leres ieu sim kuring yeuh. Hehehe. Sapopoe mah angger we ngaran sim kuring teh Nunu, ngan dina seratan wungkul sok nganggo Nazaruddin Azhar teh. Hatur nuhun tos linggih. Kumaha wartosna ayeuna? Mugia sehat sapapaosna…

  3. Ass.Wr.Wb.
    Damang Kang Nu?. Tepang sareng Pribados dina acara workshop sastra sunda pikeun rumaja, alpukah Kantor Pariwisata dan Kebudayaan Kota Tasikmalaya, Kang Nunu salah sawios narasumberna sasarengan sareng Acep Zamzam Noor, di Hotel Ramayana taun 2006, lah wios ari hilap mah ke ari tepang urang ngadongeng.
    Kataji ku seratan di luhur, memang kanggo ngamumule basa sunda kedah aya media, teu tiasa ngandelkeun koran wungkul margi jelema ayeuna tos teu resep maca, saupamina ditayangkeun dina TV, rada sesah milarian stasiun TV swasta nasional anu puruneun minronkeun basa sunda margi dianggap teu gaduh nilai komersial, janten memang radio janten pilihan media akhir dina ngamumule basa sunda.
    Tiap malem rebo di radio B n B Cineam, aya panglawungan ngadu bako, dieusian ku kawih sunda, di garap ku kang Sula saparakanca, via telepon para pamirsa tiasa ngawih dipirig kum kacapi plus gamelan alit ( kendang, goong ), aya penyiar sajodo, kawilang rumaja keneh,tapi basa sundana lancar sareng merenah (taroskeun we geura ka Kang Nurakhmad).
    Kitu deui di radio sanes sok rajeun kakuping aya acara samodel kitu.
    Sok sanaos upami dietang ku persentase peminat basa sunda dina radio saeutik pisan upami dibanding sareng jumlah rumaja nu aya mung asana basa sunda kalebet seni sundana teu acan pareum, mangga urang tarekahan ku sadayana, urang mumule ku sarerea, terutama anu sok nginpi sareng ngalamun keneh ku basa sunda
    Haturnuhun.

  4. Haturan, alhamdulillah tiasa tepang deui Kang Dedi, sok sanaos mung ukur dina ramat loka.
    Sim kuring ngiring reueus ku acara di Radio BnB Cineam. Tangtos, eta acara teh kalintang saena, kanggo ngiring ngawewegan kanyaah urang kana Basa Sunda. Salamna ka Kang Sule, saparakanca. Mugia urang tiasa tepang deui di “darat” hehe. Sareng upami gaduh sajak Sunda, sim kuring ngantos pisan kintunanana, kanggo dina Priangan. Sapertos kapungkur hehe. Tiasa dikintun ka alamat surelek: opinipriangan@yahoo.co.id. Hatur nuhun.

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

%d blogger menyukai ini: