goreng hate

Balik siaran isuk-isuk. Biasa we, da ngan ukur sabaraha puluh meter ti studio ka imah teh. Leumpang nyalse bari sakapeung kabengbat ku imbit nu nuju salepor. Heuheu. Da nyakitu kapan, Dadaha mah tempatna nu keur ngolah awak ngaluarkeun kesang sangkan sehat. Ari kuring mah teuing ku sok haroream wae rek ngadon lulumpatan jiga batur teh. Rajeun teh aya nu ngajak lumpat (ngajak teh pedah ningali awak kuring beuki meber meureun, mangkarunyakeun ti dituna mah), sok terus dijawab, “Pan uing mah enggeus muruhkeun. Ari lumpat sorangan mah da cape,” cekeng. Matak tara aya deui nu ngajak lumpat teh.

Seger angin isuk-isuk teh. Keur wancina laer kanjut ceuk kolot baheula mah (kade tah lain porno, da memang kitu sesebutanana keur nyebut wanci nu hade pikeun moyan teh, bilih teu percanten, tinggal buku “Peperenian” wedalan Kiblat….hehe iklan euy…). Basa ka hareupeun ngahiuk angin seungit tina parfum hiji mojang sipit nu teuing geus sabaraha puteran seporna, bet aya nu megat.

“Kaleresan tepung Kang,” cenah. Ngaakangkeun, padahal umurna mah leuwih kolot itu. Mindeng tepung jeung si Akang eta teh (nyebut akang deui we kuring ge ka manehna teh) da manehna ge salah saurang tukang sepor nu mindeng ngaliwat ka hareupeun gedung kasenian tempat kuring sok remen ceuceuleuweungan.

“Aya naon Kang, rareuwas yeuh…” pok teh.

Manehna terus weh ngajak ngobrol, yen opat poe ka tukang kakara pisan boga orok. Awewe cenah. Nyikalan.

Euleuh? Geuning kakara boga anak? Gerentes hate. Atuda, manehna teh ceuk taksiran umurna geus aya 45 taunan mah. Malah boa leuwih. Telat kawin jigana ki silah teh. Heueuh make jeung goreng hate kuring teh, ngupat manehna tur manehna aya pisan hareupeun.

“Opat puluh taun langkung atuda ayeuna abdi teh, nembe kaparengkeun gaduh putra… Alhamdulillah… ” pokna.

Matak ge ulah telat-telat teuing kawin teh. Umur opat puluh leuwih kakara boga orok, gerentes hate.

“Ti kapungkur hoyong gaduh putra, nembe ayeuna ti pun bojo nu kadalapan, kakara gaduh…” pokna daria.

Baruk? Pamajikan kadalapan? Heuheu, bet era sorangan… Nu disangka telat kawin teh singhoreng geus kawin dalapan kali!

Terusna mah manehna nanyakeun harti kecap nu rek dijieun ngaran anakna. Nya dijawab sabisa-bisa we ku kuring teh. Nu jelas mah, pingaraneun anakna nu munggaran teh alus pisan.

Iklan

About nazarudin azhar

urang sunda pituin

Posted on 21 Maret 2008, in Ngabako. Bookmark the permalink. Tinggalkan komentar.

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

%d blogger menyukai ini: