Puisi Nazarudin Azhar

Poé-poé Kalarung
:Tori Amos

kukupu nu ngabrul tina pigura bodas
jangjangna raca ku denting piano kayas
jadi sabubuhan poé-poé kalarung
nu meuntasan leuweung pangpung
sabot dina rumbay rambut anjeun
1000 kalakay miharep dipuisikeun

hawar-hawar nu cunduk ti riuk usum
lir madakeun alum sora na rangkulan geter bulan
nu ngajangkari na lénglang kasurti langit
sanggeus simpé karadak ku lukut nahun
sanggeus taya deui eunteung pikeun nu nyungsi laratan

da horéng wirahma anyar
nu ngaweuhan dina umur sésa lampar
ukur kelir nu mindingan tapak céda
na sakujur cinta nu geus teu majar kumaha

2006

Sanggeus Kapalidkeun Angin
: Sarah Brightman

di hiji musieum
leungeun anjeun robah jadi lilin beureum
ngusap peteng nu sumerah
ka cahaya nu nampanan kaguligah

sakabéh sarah sanggeus kapalidkeun angin
ukur tiba ka muara nu saat walunganana
implengan beuki jauh tina lambak pangbagéa
ngahunyud jadi sakadar catetan
ladang nyungsi impian teu kasurahan

ti hiji musieum
maridang deui dalingding puisi tingtrim
sanggeus peuting di luareun ieu sukma
ukur jempling nu geus leungiteun sihirna

2006

Hiji Albeum
: Joan Baez

potrét-potrét burem hiji albeum
lain jandéla bukaeun mangsa kapahung
sanggeus tineung ngajak lunta nikreuhan tarahal jalan
nu terus nanjak bangun leungiteun pudunan

haleuangkeun deui tapi lain lagu tamba
najan mangabad kasimpé
bisa rubuh ku ngan sajentréng wirahma
seuneu urang aya na pirunan sora
nu mampuh meruhkeun haté
nu mindeng sungkan tamada

2006

Rangrang Kamelang
: Rita Tila

dayeuh bungur pamiangan
ayeuh ku sagulubur héman
sora saha nu sumambat
ti hiji tabet sabot témbong katumbiri
nu kungsi dalit jeung niat
raket dina sakarémbong wanci

tapi lalakon, welit kapisahkeun jalon
sakelir tapi da béda suhunan
saban lilir kasepi misah wangunan

mending sapih saméméh ajal rumekah
ulah nolih sakabéh awal kapeurih
hiji dungus mun téa mah diiwalkeun
ukur humus keur leuweung sapandeurieun

2006

*Rangrang Kamelang, judul lagu ciptaan Nano S

Kota Katuna
: Jewel

kota katuna, kota pinuh ku momonés
nya di dinya, simpé téh remen kaderes
sabot leumpang mipir jungkrang
rembet ku lampu baranang

héab anggur direkéskeun jadi dunga
keur maranéhna nu ngawangun ieu surga
tempat urang kapaksa jadi jarum jam
dina pamuiran rasa nu béda jeung nu diajam

ka lebah datangna peuting
nu lawas ilang sarina
lir wanoja geulis tapak ngaropéa
anjeun mindeng ngahariring
sangkan petétan teu sirna
dirérab héab katiga

kana ranjang nu ngan saukuran awak
galindeng téh sakapeung lir nu nyasaak
sakebét tresna dina surat tan alamat
dina dada nu geus heubeul teu karumat

2006

Iklan

About nazarudin azhar

urang sunda pituin

Posted on 9 Januari 2008, in Puisi. Bookmark the permalink. Tinggalkan komentar.

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

%d blogger menyukai ini: