mangsa lawas, 2

nostalgi

simpé nu datang deui
jiga rélip batu candi
nu nungtut renghat
sabot nembrakkeun hiji nostalgi

karandapan deui
kasmaran jeung kaleungitan
hujan poyan katumbiri
mapaés sarigsig beusi
pangbuian dina manglikur kamari

kamar lir trapésium
di tengah ranca tungtung usum
aya nu dikelat jempling
sanggeus pasosoré ngoléab
kana umpalan halimun

kalangkang nu sungkan tepung
sirna na sirkel kasuwung

1998

simponi sapamiangan

kungsi dibalakakeun
ka anjeun
urang baris tepi
ka sangli

jadi sapasang turis
di tengah basa nu béda
salambar atlas jeung kamus
leungit harti na pasemon cuaca

waktu gé bet samporét
dina simponi Chopin
katineung jadi sakasét
jeung ngadadak apilain

“urang nu teu weleh sono
pangling deui jeung baréto
hiji wangunan terus robah
pikeun nu mulang
jeung nu ngadago.”

horéng kajanglar
teu karampa ogé
na Bizét jeung Mozart

ukur séah angin
lain simponi Vivaldi
atawa Tchaikovsky
wirahma basajan
nu geus meruhkeun
bayeungyang wanci

angin nu datang sapamiangan
jeung kereteg séwang-séwang

1998

usum hujan

sanggeus sababaraha lagu blues
lelembutan katambias ka pagéto
hawa tiris, warna-warna tropis
awor na lukisan-lukisan torso

girimis nu ditundung
ti hiji tapel wates
kabadé baris langgeng
mancawurakeun wanci nu peupeus
na hiji siklus

aya pikiran nu sono lampar
ukur nulis-nuliskeun mémoar
na dingding kamar sepi
satangtung birahi

rélip leungiteun gambaran
pager beusi karahaan
dina tralis, régang kalangkang pareunggas
aya kangen nu ngahaja
dipiteskeun

aya ringkang kaimpleng teuneung
saacan nilar tapak
na rurumpil jalan nanjak

laju musik overtune
lukisan-lukisan tingkalayang
ngajomantara
jadi sora

1998

sapasang panonpoé

tapak angin
diménsi lian
udat-udat randegan
teu kebatna héman

simpé ngulisik di pasir nenggang
salsé nembangan ringkang
sapasang panonpoé
na pananggalan

1997

hiji lagu tina a minor

naon nu baris kedal
mun dada karasa hapa
hariring teu ngawirahma
sora hitar, senarna pinuh karaha
silung teu beunang ku disusurup

lagu urang boa lain lagu teuneung
mangsa léngkah niat ngabaladah jalan anyar
bangreung hareupeun réana wangunan
nu nyumputkeun gang satukangeun
kulawuna pager-pager jangkung
kakeyeng nepungkeun tineung
kateug lebah palataran hieum

lagu urang lagu babantar ngolétrak
handapeun rawayan mangsa
misono hujan nyinglar katiga
mireng kembang jeung daun
ngararas na dahan katigin batin

1997

orkéstra simpé

taya ungkara nu diharéwoskeun Beethoven
dina komposisi Fur Elise. Tapi sora piano
lir keteg jajantung nu pinuh kasono

taya kalimah cinta nu dikedalkeun Beethoven
tina CD di hiji kafétaria. Tapi di luar
hawa tiris geus ngébréhkeun sagalana
girimis nu raat nyésakeun katibelat kuring
kana hiji tungtung kasono nu manjang

basa peuting nanjeurkeun anggang
antara lemah jeung bulan
taya kalimah pileuleuyan pikeun kuring
nu lumampah sorangan

1996

Iklan

About nazarudin azhar

urang sunda pituin

Posted on 7 September 2007, in Puisi. Bookmark the permalink. 2 Komentar.

  1. kang nunu, mana atuh sajak-sajak nu anyarna. simkuring hoyong maca.

  2. sajak anyana ke tiasa diaos di dieu nya…

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

%d blogger menyukai ini: