mangsa lawas, 1

karangresik

lir ramo-ramo simpé
pucuk-pucuk pines
alon ngusapan halimun
ngusapan tatu hiji sajarah lawas

ruruntuk jambatan. Beungeut jajatén
nu pireu. Batu-batu Citanduy
jadi wilangan karémpan
na rerengat tarang mangsa

luhureun taman angin sungkawa
nelekinan lalakon nu taya kuburna
getih kapeurih namper ukur jadi monumén
wanda asing na papastén kamerdékaan

1994-1996

katémbong bulan

basa hawa tiris mimiti nurunkeun ibun
katémbong bulan na sesela dahan katapang
cahayana sawaréh murag kana lahunan

satemenna aya nu disumputkeun simpé
dina puteran jam. Aya haté anteng maluruh
saniskara tanda na tiap semu nu liuh
di dieu, handapeun legana langit
aya dunya eusina ukur duaan
adam jeung hawa nu hémeng
di tengah asingna sampalan

bulan téh can buleud pisan, ceuk anjeun
kalangkang daun jadi tilam tatapakan batin
nu saterusna ukur silih lelebah
timbangan wawanén reujeung guligah

1996

ngebatkeun léngkah

tong waka nanya di mana ahir lalana
sabab rasa can hatam maca rumasa
ukur ngimpleng jamparing
labas norobos jejempling suwung
nancebna boa na mamaras saha

na gorowong iga sareupna
kungsi kapireng sora angin peura
mawa aweuhan nu tiheula lunta
nebarkeun cikatresnan
na salega sampalan kingkin

tong waka nakon
lebah mana nanjeurna lalakon
sabab na atlas kucel sawangan
lebah-lebah sorangeun can karuhan
kajugjugan. Ngebatkeun léngkah
pikeun hiji rusiah
nu motah sajero guligah
sungapan mangpirang kamalir
urat-urat cinta jeung dikir

1997

setatsion

sakeudeung deui rél gumeter
gerbong-gerbong ngakut kakelar
ka lebah-lebah tempat implengan
sok remen lampar

satemenna taya nu bisa dibaca
dina sareupna nu alon turun
lian ti kecap pileuleuyan
namper na hihieum péron

kagagas nu ditelon cipanon
ngajak luas sapasemon

sakeudeung deui setatsion
baris nyambungkeun lalakon

bet karasa aya nu reuntas
sanggeus napas dicangreud
na saban bordés

1998

Iklan

About nazarudin azhar

urang sunda pituin

Posted on 7 September 2007, in Puisi. Bookmark the permalink. Tinggalkan komentar.

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

%d blogger menyukai ini: