Cikaracak
cikaracak tina juru mata poé
ninggang batu dina lungkawingna haté
laun-laun jadi hélok, mireng nu sakapeung nalék
naha rék sabara abad, sangkan cinta léah sujud?
deuh, sukma nu ngamangandeuh
na landeuheun lilinduh jalan satapak
nu ditaratas karuhun
leuh, poma tong nabeuh bangbaluh
saban reureuh léngkah keuna ku pitapak
balas meungpeun ku paralun
teu kaci teu wani
surti mah sok pasinikeun
teu naha teu naon
sono mah geura tohonan
2006
Gerendeng
kana pencrong nu kapelong
sakapat wanci ngaléong
langit lir lautan sora
tapi kekembangan nu heubeul geus jadi rampé
katalimbeng deui di kebon simpé
taya isarah
taya
ukur gerendeng nu maneuh
di luar sungkawa
2006
Cinema Paradisso
dunya bakal terus robah, Alfrédo
jiga saban adegan na sahunyud séluloid
nu ngalangkangkeun rupa jeung sora
sanggeus kasorot cahaya
lalakon hideung bodas
nu bisa beueus ku lawas
pias sanggeus sakolébat nyacas
lir katineung na lening peuting
méméh bala ku rupaning carita
na poé anyar nu masih kénéh tumiba
hirup nu kudu ditaker ku kasurtian
bakal tetep ngamalirkeun aworna ceuceub jeung héman
dina moral carita nu salawasna robah
na layar panénjo urang
2006
Wahangan Waktu
pahareup-hareup jeung hirup
nu can kaheurap huripna
wahangan waktu
mungkas séah jero dada
tatu batu céda kula
leuwi diparak asihna
ti ditu dikeprak suka
kawihna nalék nu sirna
aya jeung euweuh
silih bagéakeun galeuh
sabot mulang ka melangna
nu langgeng ngajirim kula
2006
Sabot Tepung
sanggeus sakabéhna kedal
jadi arak nu mudal tina gelasna
nu tinggal saukur botol nu harapa dina dada
musik nu milu ngusikkeun kasono urang
teu kungsi nepungkeun
naon nu keur dipimelang
ukur simpé nu demit
sésélékét dina késétan biola
lir wawakil hiji sora
nu leungit tina wirahma
2006
Kasuwung
manéhna terus miharep aya nu ngaliwat
tur nyimpangkeun imutna. Padahal cikénéh téh pamit
tapi, ké lanan, pokna terus melong deui umpalan halimun
nu bedah tina saban juru taun. Taya sasaha. Malah angin
nu sok nyalingker dina sesela pager, pan angger taya jirimna
bari nahan kahanjelu sanggeus saban peuting nyaring
manéhna terus mulang kana urat panon kuring
ayeuna nya kuring nu panasaran, mindeng nyebutkeun ké lanan
bari nénjokeun kasuwung nu geus neureuy sakur jalan
2005
Sora
pasemon nu ngaboéhrarang melong kakosong
di satukangeun tulang iga. Jangjang simpé ngeleper
kakubeng guruwung dada. Aya rasa nu ngeprulkeun karahana
aya manuk ngelak ti hiji munara sora. Walungan-walungan anyar
mubus kana lipetan waktu sabot sakabéh séahna
ngelun jadi saab nu kulawu
di darmaga pangimpungan sakur kalangkang
mangrebu lagu nu kungsi kahariringkeun
ukur jadi sapada nu kabaca dina urat angin tineung
peuting ngalambak gumulung, nyéblokkeun teuteupan anjeun
kana patelakna sora nu nolak jeung ngabaeukeun
2005
tina panto kaca, urang angger teu bisa norah saha deui nu baris ngalalar di jalan. naha jalma saliwat, atawa nu geus puguh wawuh. atawa nu kungsi datang terus nawarkeun bangbaluh.
jaleuleu