Gambar Jilid Buku Aan Merdeka Permana

DESAIN kaver atawa jilid buku Pa Aan Merdeka Permana,  kenging sim kuring. Ngahaja ditapelkeun dina blog, etang-etang pameran hehe… :p

Duka iraha medalna bukuna mah da nyakitu tea, Pa Aan mah pangarang nu kacida sibukna, produktif, lian ti ngarang novel, carpon, oge ngokolakeun majalah Ujung Galuh.

Bilih aya kritik kana gambar kenging sim kuring ieu (jilid payunna wungkul, da bade ditapelkeun sareng jilid tukangna mah bilih orat, heuheu…), mangga wae nyerat dina komentar…

Naskah Drama ROH

Malem Ahad kamari, sapeupeuting nyaring, ngadon ngobrol jeung babaturan ti komunitas Oi Trotoar, di saung Trotoar. Rea nu kasampeur dina obrolan teh, ti mimiti rupaning kagiatan kasenian nu beuki jempling di Tasik (aya ketang, tapi teu matak uruy ngalalajoanana, ku sababaraha alesan), ngobrol ngeunaan proses kreatif, tepi ka masalah jodo. Ma’lum rea keneh nu jomblo heuheu…

Kaobrolkeun masalah naskah drama. Enya, kuring teh kungsi nulis naskah drama Basa Sunda nu judulna “ROH”. Kira awal taun 2000, kuring nulis eta naskah. Ti harita teh lat weh poho, kaingetan deui basa saderek Acong ti Oi (harita inyana aktif keneh di Teater Ambang Wuruk), nu nyaritakeun eta naskah. Beu, barang dibaca teh bet rada kaget, singhoreng kungsi nulis naskah eta tur eusina rada “beurat” hehe. Nyabit-nyabit masalah eksistensi manusa dina perkara iman ka Pangeran (asana, kudu maca deui naskahna yeuh hihi).

Rek diropea deui sabenerna mah eta naskah teh, utamana pungkasan caritana, tapi deui-deui poho deui. Huh. Tepi ka ahirna mah kamari, maksud teh anyar keneh, awal Mei 2009, naskah Roh teh dipentaskeun ku Jabo Widianto jeung Andar ti Teater Dongkrak, dina acara “Nyawang Ringkang lembur Urang 2″ di Cineam, Kab. Tasik, alpukahna Sanggar Seni Awi Hideung Cineam. Ukur bisa ningali foto pagelaranana. Can kungsi lalajo.

Fotona di luhur. Jabo jeung Andar. Foto Dok. Teater Dongkrak.

keur widya

tina panto kaca, urang angger teu bisa norah saha deui nu baris ngalalar di jalan. naha jalma saliwat, atawa nu geus puguh wawuh. atawa nu kungsi datang terus nawarkeun bangbaluh.

salasa teu beda jeung poe sejen, sanggeus hujan remen uluk salam, terus ngamparkeun tirisna. di buruan katembong keneh cileuncang katut daun usum nu muguran. jadi tatapakan pikeun sakabeh ingetan nu ngajak lunta, mireng celak cahaya di hujung jalan pangjauhna.

lawung teh ngan sabengbatan. embohna ukur hate nu haliwu, diajak ocon lamunan ti poe nu hamo bisa kalarung.

9 juni 09